BHT PÅ DAGSORDENEN: Nye innlegg har løfta spørsmål om bedriftshelsetenesta og Arbeidstilsynets rolle. Direktør Ingvill Kvernmo fortel korleis vi arbeider med ordninga. FOTO: Arbeidstilsynet.
Av Ingvill Kvernmo, direktør i Arbeidstilsynet
Innlegget vart først publisert i Dagsavisen 29. september 2026.
I Dagsavisen 17. september uttrykker sju spesialistar i arbeidsmedisin bekymring for at kommersielle tenester, som legetimar og helsekontrollar, kan få større plass i bedriftshelsetenesta (BHT) på kostnad av det førebyggande arbeidsmiljøarbeidet. Dei spør òg korleis Arbeidstilsynet følger opp godkjende bedriftshelsetenester.
LO følger opp debatten 24. september og løfter fleire av dei same spørsmåla, blant anna om reguleringa og oppfølginga av godkjenningsordninga for bedriftshelsetenester.
Denne debatten er både viktig og nødvendig. Innspel frå fagmiljøa og partane i arbeidslivet hjelper oss med å vurdere korleis ordninga fungerer, og korleis ho kan bli betre. Vi kjenner igjen fleire av utfordringane, og følger dei opp gjennom tilsyn, dialog med bransjen og arbeidet med å vidareutvikle ordninga.
For Arbeidstilsynet er utgangspunktet klart. Den viktigaste oppgåva til bedriftshelsetenesta er å hjelpe verksemdene med å skape trygge, sunne og helsefremmande arbeidsmiljø. Mange BHT-er gjer ein viktig og god jobb. Kvar dag bidreg dei med kunnskap og råd som gjer det lettare for arbeidsgivarar og tilsette å førebygge sjukdom og skade, før nokon blir sjuke eller skada av jobben.
Ein godkjent BHT skal gi heilskapleg, førebyggande og risikobasert hjelp i det systematiske HMS-arbeidet for verksemda. Det kan vere hjelp til å kartlegge farar, vurdere risiko og finne tiltak som verkar i arbeidskvardagen. Målet er ikkje først og fremst å reparere når noko har gått gale, men å bidra til at belastningar, sjukdom og skadar ikkje oppstår.
Mange godkjende BHT-er tilbyr òg kommersielle tilleggstenester. Det har dei anledning til. Samtidig må det vere lett for verksemdene å forstå kva som er lovpålagt BHT-bistand, og kva som er tilleggstenester. Vi får tips frå arbeidslivet om aktivt sal av tenester som ikkje er lovpålagde. Skal ordninga verke etter hensikta, må BHT-eine sjølv vere tydelege på kva dei tilbyr, og sørgje for at tilleggstenestene ikkje fortrenger det førebyggande arbeidsmiljøarbeidet.
Arbeidstilsynet regulerer ikkje kva tilleggstenester aktørane kan tilby. Oppgåva vår er å følge opp at godkjende BHT-er oppfyller krava i ordninga, mellom anna gjennom tilsyn. Når krava ikkje er oppfylte, kan vi gi pålegg og i verste fall trekkje godkjenninga.
Men god oppfølging handlar om meir enn kontroll. Vi følgjer òg utviklinga gjennom rettleiing og dialog. Ei evaluering frå Oslo Economics har sett på tiltak som kan gjere BHT-ordninga meir målretta og effektiv. Saman med blant anna STAMI har vi oppretta Fagrådet for BHT, som vurderer korleis ordninga fungerer og kan gi råd om vidare utvikling.
Diskusjonen gir verdifulle innspel til dette arbeidet. Vi skal følge utviklinga tett, bruke tilsyna der dei treffer best og heile tida sjå etter korleis oppfølginga kan bli betre.
Kjernen er likevel enkel. Bedriftshelsetenesta skal først og fremst hjelpe verksemdene med å førebygge at menneske blir sjuke eller skada av jobben. Når BHT rettar kompetansen mot dei faktiske utfordringane på arbeidsplassen, kan risiko fjernast før han rammar. Det er ikkje ei tilleggsteneste. Det er sjølve oppdraget.